​বিলাসীপাৰাত আমছু’ৰ প্ৰতিবাদী মানৱ শৃংখল: D-Voter আৰু সমষ্টি পুনৰ নিৰ্ধাৰণৰ বিসংগতি দূৰ কৰাৰ দাবী

বিলাসীপাৰাত আমছু’ৰ প্ৰতিবাদী মানৱ শৃংখল: D-Voter আৰু সমষ্টি পুনৰ নিৰ্ধাৰণৰ বিসংগতি দূৰ কৰাৰ দাবী
বিলাসীপাৰা:
সদৌ অসম সংখ্যালঘু ছাত্ৰ ইউনিয়ন (আমছু)ৰ কেন্দ্ৰীয় সমিতিৰ নিৰ্দেশমৰ্মে আজি আমছু’ৰ বিলাসীপাৰা জিলা সমিতিৰ উদ্যোগত এক বিশাল প্ৰতিবাদী মানৱ শৃংখল কাৰ্যসূচী ৰূপায়ণ কৰা হয়। দেশৰ মুখ্য নিৰ্বাচন আয়োগৰ বিৰুদ্ধে উত্থাপিত D-Voter, SIR প্ৰক্ৰিয়া আৰু সমষ্টি পুনৰ নিৰ্ধাৰণৰ ক্ষেত্ৰত হোৱা বিভিন্ন বিসংগতিৰ প্ৰতিবাদত সংগঠনটোৰ কৰ্মীসকলে মুখত ক’লা কাপোৰ বান্ধি এই ব্যতিক্ৰমী প্ৰতিবাদ সাব্যস্ত কৰে।
প্ৰতিবাদকাৰীসকলে নিৰ্বাচনী প্ৰক্ৰিয়াৰ স্বচ্ছতা, ন্যায়সংগত ব্যৱস্থা আৰু জনসাধাৰণৰ গণতান্ত্ৰিক তথা সাংবিধানিক অধিকাৰ সুনিশ্চিত কৰাৰ বাবে চৰকাৰ আৰু নিৰ্বাচন আয়োগৰ ওচৰত জোরদাৰ দাবী জনায়।
প্ৰতিবাদকাৰীৰ মুখ্য দাবীবোৰ:
প্ৰতিবাদী কাৰ্যসূচীত অংশগ্ৰহণ কৰা আমছু’ৰ কৰ্মীসকলে হাতত বিভিন্ন দাবী সম্বলিত প্লেকাৰ্ড লৈ চৰকাৰবিৰোধী দাবী উত্থাপন কৰে। প্ৰতিবাদত প্ৰদৰ্শিত প্ৰধান প্লেকাৰ্ডসমূহ আছিল:
* ভাৰতীয় নাগৰিকৰ ভোটাধিকাৰ সুৰক্ষা: “ভাৰতীয় নাগৰিকৰ ভোটাধিকাৰ খৰ্ব কৰা বন্ধ কৰক”, “ভোটাধিকাৰ কাঢ়ি লোৱা ষড়যন্ত্ৰ বন্ধ কৰক” আৰু “সাংবিধানিক অধিকাৰ খৰ্ব কৰা নচলিব।”
* সমষ্টি পুনৰ নিৰ্ধাৰণ আৰু D-Voter সমস্যা: “জনসংখ্যাৰ অনুপাতে সমষ্টি পুনৰ নিৰ্ধাৰণ কৰক”, “সমষ্টি পুনৰ নিৰ্ধাৰণৰ বিসংগতি দূৰ কৰক”, “D-Voter সমস্যাৰ স্থায়ী সমাধান কৰক” আৰু “SIR/SR প্ৰক্ৰিয়া বন্ধ কৰক!”
* সমান অধিকাৰ আৰু সমতা: “সকলো নাগৰিকৰ সম-অধিকাৰ সুনিশ্চিত কৰক”, “ধৰ্ম-বৰ্ণ নিৰ্বিশেষে সকলোৰে সমান অধিকাৰ নিশ্চিত কৰক”, “প্ৰতিগৰাকী নাগৰিকৰ অধিকাৰ সুৰক্ষিত কৰক” আৰু “বৈষম্য নহয়, সমতা লাগে — সকলোৰে বাবে ন্যায় লাগে!”
* অন্যান্য দাবী: “ন্যায়সংগত প্ৰতিনিধিত্ব নিশ্চিত কৰক”, “নিৰীহ নাগৰিকক হাৰাশাস্তি বন্ধ কৰক” আৰু “গণতন্ত্ৰৰ মৰ্যাদা অক্ষুণ্ণ ৰাখক।”
প্ৰতিবাদকাৰী নেতৃবৰ্গই স্পষ্ট কৰি দিয়ে যে সাধাৰণ নাগৰিকৰ ওপৰত চলোৱা অন্যায়, হাৰাশাস্তি আৰু নিৰ্বাচনী বিসংগতিসমূহ দূৰ নোহোৱালৈকে আমছু’ৰ এই প্ৰতিবাদী সংগ্ৰাম অব্যাহত থাকিব।