ডিব্ৰুগড়ৰ খলিহামাৰীৰ নন্দন ইলেক্ট্ৰিকেলছত সংঘটিত হৈছে এক চুৰিকাণ্ড। অভিযোগ অনুসৰি, ২৬ ছেপ্টেম্বৰৰ নিশা অজ্ঞাত দুৰ্বৃত্তই প্ৰতিষ্ঠানটোত প্ৰৱেশ কৰি বৃহৎ পৰিমাণৰ মূল্যৱান বৈদ্যুতিক সামগ্ৰী লৈ উধাও হয়।
ঘটনা সন্দৰ্ভত নন্দন ইলেক্ট্ৰিকেলছৰ মেনেজাৰ দীপক নামাসূদ্ৰই ২৭ ছেপ্টেম্বৰত ডিব্ৰুগড় সদৰ থানাত এজাহাৰ দাখিল কৰে। এজাহাৰত উল্লেখ কৰা অনুসৰি, দুৰ্বৃত্তই ষ্ট’ৰটোত প্ৰৱেশ কৰি তামৰ বৈদ্যুতিক তাঁৰৰ বাণ্ডিল, উচ্চ-ভল্টেজ ঔদ্যোগিক কেবল আৰু বিভিন্ন ধৰণৰ ৱায়াৰিং ৰোল চুৰি কৰে।
চুৰি হোৱা সামগ্ৰীসমূহৰ বজাৰ মূল্য যথেষ্ট বুলি জানিব পৰা গৈছে। মেনেজাৰগৰাকীয়ে আৰক্ষীক ঘটনা সন্দৰ্ভত এজাহাৰ পঞ্জীয়ন কৰাৰ লগতে ঘটনাস্থলী পৰিদৰ্শন, উপলব্ধ CCTV ফুটেজ পৰীক্ষা, প্ৰমাণ সংগ্ৰহ আৰু চুৰিৰ সৈতে জড়িত লোকক চিনাক্ত কৰি চুৰি হোৱা সামগ্ৰী উদ্ধাৰৰ বাবে ব্যৱস্থা গ্ৰহণৰ আহ্বান জনাইছে।
ইফালে, ব্যৱসায়িক প্ৰতিষ্ঠান তথা নিৰ্মাণস্থলীত সংৰক্ষিত তামৰ তাঁৰ আৰু ঔদ্যোগিক কেবলৰ নিৰাপত্তাক লৈ নতুনকৈ উদ্বেগৰ সৃষ্টি হৈছে। এই সামগ্ৰীসমূহৰ অধিক মূল্যৰ বাবে বিভিন্ন স্থানত তাঁৰ চুৰিৰ ঘটনা বৃদ্ধি পোৱাৰ অভিযোগো উত্থাপিত হৈ আহিছে।
চুৰিকাণ্ডৰ আঁৰত কোনো সংগঠিত কেবল চুৰি চক্ৰ জড়িত থাকিব পাৰে বুলি অভিযোগকাৰীয়ে সন্দেহ প্ৰকাশ কৰিছে যদিও এই বিষয়টো এতিয়াও নিশ্চিত হোৱা নাই। ঘটনা সন্দৰ্ভত আৰক্ষীৰ তদন্তৰ পিছতহে চুৰিকাণ্ডৰ প্ৰকৃত তথ্য পোহৰলৈ আহিব।
